CEIP de Figueiroa

O Ceip de Figueiroa foi seleccionado pola Consellería de Cultura, Educación e Ordenación Universitaria como un dos 25 centros piloto en Galicia para pór en marcha o Proxecto “E-LBE” que ten como obxectivo a incorporación de lectores electrónicos ou e-lectores ás Bibliotecas Escolares.

Esta iniciativa está incluída do Plan LIA de bibliotecas escolares e dirixida a centros que están integrados no PLAMBE (Plan de Mellora de Bibliotecas Escolares).

O centro será convocado en datas breves a unha reunión informativa onde se fará entrega dos 3 dispositivos de lectura asignados.

Este novo logro supón un recoñecemento ao esforzo que nos últimos anos se ven facendo dende o centro (claustro e Anpa) para estar na vangarda das novas tecnoloxías aplicadas ao ensino.

O noso centro a través da Resolución provisional do 17 de xullo de 2012, pola que se autorizan novas seccións bilingües para o curso 2012/2013, foi autorizado a pór en marcha no vindeiro curso escolar catro seccións bilingües, 2 no primeiro nivel de Primeiro Ciclo (1º A/B) e 2 no primeiro nivel de Segundo Ciclo (3º A/B). A materia non lingüística que se impartirá nestes cursos será a de Plástica.

Con esta nova iniciativa pretendemos utilizar o inglés como vehículo de aprendizaxe e de coñecemento noutras áreas curriculares co obxectivo de desenvolver nos alumno/as o coñecemento e uso adecuado, tanto da lingua galega como do castelá e da lingua inglesa, nas súas manifestacións oral e escrita, que permitan aos alumnos/as adquirir a competencia comunicativa necesaria para desenvolverse en situacións cotiás, dando prioridade ás destrezas de escoitar (Listening) e falar (Speaking) para posteriormente ler (Reading) e escribir (Writing).

A Consellería de Traballo e Benestar, a través da Dirección Xeral de Xuventude e Voluntariado, convoca, unha vez máis, a Campaña de Verán 2012, para favorecer que a xuventude empregue parte do seu tempo vacacional en actividades de carácter lúdico, cultural, deportivo e formativo, que sirvan non só para divertirse senón tamén para o enriquecemento persoal e vital, ademais de ofrecer a posibilidade de coñecer outros territorios da xeografía nacional.

'Acción de Verán' é un programa de actividades que ten lugar durante os meses de xullo e agosto, tanto en Galicia como noutras comunidades autónomas. Está composto por diferentes áreas, que comprenden actividades de lecer para toda a xuventude e actividades de voluntariado en campos de traballo nacionais e estranxeiros.

As actividades da campaña de verán están dirixidas a todos aqueles mozos e mozas que desexen pasar un verán diferente, cooperando en iniciativas sociais ou compartindo experiencias con outros rapaces en campamentos de todo o estado. Son unha forma económica e divertida de axudar e gozar.

      O vindeiro domingo día 26 de febreiro, 30 alumnos/as do noso centro, xunto con tres profesores/as, realizarán unha saída educativa a Rasquera (Reus - Tarragona). Esta saída enmárcase dentro do Proxecto Arce (convocado polo Ministerio de Educación) no que este centro está a participar xunto con outros tres de distintas comunidades autónomas (Catalunya, Balears e Canarias).

      A saída terá lugar ás 13:40 h. do aeroporto de Lavacolla con destino ao aeroporto do Prat (Barcelona). Desde alí ata Rasquera deprazaranse en autobús. Estarán aloxados na casa de colonias "CA MANXOL".

      Para moitos nenos/as será unha experiencia única, xa que voarán por primeira vez.

      Durante a súa estancia nesta vila visitarán os colexios de Ginestar e Rasquera e participarán nunha xornada de convivencia con alumnos/as dos dous centros. A temática desta xornada xira ao redor dos xogos tradicionais propios da comarca visitada. O martes pola mañá estarán en Miravet e realizarán un paseo en barca polo río Ebro e percorrerán a parte antiga do pobo, o castelo e un oleiro; pola tarde, irán a Benissanet para visitar unha cooperativa (Grup Fruit), o Museo da Música e un refuxo antiaéreo.

      O último día, mércores 29, pola mañá estarán en Rasquera visitando un forno de pastissets, unha llatadora e a Ermida de Santo Domingo. Ás 16:00 h. partirán en autobús cara o aeroporto do Prat donde embarcarán no avión rumbo a Santiago de Compostela ás 20:05 h.

      Nesta páxina web, ao seu regreso, exporemos todo o material audiovisual e fotográfico que os alumnos/as recollan na viaxe.

      A Comunidade Educativa do Ceip. de Figueiroa deséxalles unha boa viaxe.